I ba gwmni ydych chi'n gweithio?

Rwy'n gweithio i Pegasus Fire Protection - mae'r cwmni wedi ei leoli yng Nghaeredin - rydyn ni'n adeiladu parwydydd a hefyd yn creu nenfydau crog.

Beth yw'r pethau da am eich swydd?

Un o'r pethau dwi'n ei garu am fy ngwaith yw eich bod yn gallu bod mewn lleoliadau gwahanol ac rydych yn gwneud llawer o bethau amrywiol, 'fyddwch chi ddim wedi'ch clymu i swydd ddiflas 9-5 ac mae wastad cyfle i gwrdd â phobl wahanol.

Pam ddewisoch chi'r yrfa hon?

Roeddwn i'n gwneud gwaith mewn rhan arall o adeiladu, yr ochr drydanol, ac wrth siarad gyda phobl oedd yn gwneud parwydydd a gwaith mewnol, hoffais e'n syth felly cysylltais â'r cwmni a bues i'n ffodus i gychwyn yn syth. Roedd hyn dwy flynedd yn ôl erbyn hyn felly dwi wedi gwneud yn dda.

Beth ydych chi'n wneud o ddydd i ddydd?

Dwi'n mynd i'r gwaith a dwi'n paratoi'r cyfarpar a'r teclynnau i gyd, yna rydyn ni'n penderfynu ar dasgau'r dydd ac yn paratoi ein deunyddiau, yna rydyn ni'n adeiladu beth bynnag sydd wedi ei osod i ni ar gyfer y diwrnod a chwblhau'r gwaith i safon neilltuol gobeithio.

Beth yw'r peth mwyaf cŵl i chi ei wneud hyd yn hyn?

Un o'r pethau dwi'n falch iawn ohono yw prosiect yn Glasgow, yn ysbyty Stobhill, ac fe dderbyniodd Wobr Cynllunio gan Scottish Construction felly roedd yn bleser mawr gwybod bod y gwaith a wnaethom wedi cyfrannu at ennill y wobr gan ei fod ar gyfer dyluniad a thu fewn yr ysbyty.

Beth fyddech chi'n ddweud wrth rywun hoffai geisio gwneud hyn?

Byddwn yn annog unrhyw un hoffai weithio mewn swydd debyg i hon i fynd amdani oherwydd mae modd gwneud bywoliaeth dda a hefyd mae modd gweld cynnyrch gorffenedig sy'n cael ei greu ar gyfer dyfodol y wlad.

Ble ydych chi'n gweld eich hun mewn 10 mlynedd?

Hoffwn weld fy hunan yn ennill cyflog da ac yn gwneud yr un peth. Hoffwn symud i mewn i swydd reolaethol yn y cwmni hwn gobeithio.