I ba gwmni ydych chi'n gweithio?

Ar hyn o bryd rwy'n gweithio i Skanska Civil Engineering UK. Mae Skanska yn gweithio ar brosiectau peirianneg sifil o bwys sy'n ymwneud â gwaith ffordd a thraffordd, gwaith rheilffyrdd, twnelu, gwaith morol a phrosiectau chyfathrebu.

Pam ddewisoch chi'r yrfa hon?

Dewisais wneud cwrs Technegydd Peirianneg Sifil er mwyn i mi gael gwybodaeth gyffredinol am safleoedd adeiladu a sut mae prosiectau adeiladu yn dod ynghyd. Mae cael sylfaen mewn peirianneg yn agor nifer o lwybrau gyrfa gwahanol mewn adeiladu oedd yn apelio i mi gan fy mod am fod yn syrfëwr meintiau rhyw ddydd.

Beth ydych chi'n wneud o ddydd i ddydd?

Ar ddiwrnod gwaith arferol mae gen i lwyth gwaith mawr i'm cadw'n brysur; rwy'n nodi lefelau ar gyfer yr isgontractwyr, megis lefelau uchder ar gyfer dyfnder cloddio, neu nodi safleoedd lle mae angen lleoli cydrannau. Rwyf hefyd yn dadansoddi darluniau technegol a chreu darluniau newydd, archwilio gwaith dur ac yn cyfeirio yn ôl i'r darluniau hynny.

Beth yw'r pethau da am eich swydd?

Rwy'n hoffi'r ffaith nad ydw i'n gaeth mewn swydd swyddfa ddiflas o 9-5. Mae bod yn y diwydiant adeiladu yn golygu eich bod yn gweithio ar wahanol fath o swydd bob amser a'ch bod yn dysgu pethau newydd yn ddyddiol.

Rwy'n hoffi'r ffaith y gall prosiect gymryd hyd at bedair blynedd, neu cyn lleied â chwe mis ac mae'r cyfan yn cynnal eich diddordeb ac yn gyson yn taflu heriau gwahanol i'm llwybr.

Beth yw'r peth mwyaf cŵl i chi ei wneud hyd yn hyn?

Hyd yn hyn, yr wyf mwyaf balch o arllwysiad concrid a lwyddais i'w gwblhau tri mis i mewn i'm gwaith ar leoliad. Hwn oedd y tro cyntaf i mi reoli arllwysiad heb neb yn fy ngoruchwylio.

Fy ngwaith i oedd rhannu'r ardal yn giwbiau a chyfrifo faint o goncrid a faint o lwythi byddai angen. Pan gwblhawyd yr arllwysiad roedd fy nghyfrifiadau yn gywir ac roeddwn wedi rhannu'r ardal i'r union swm o giwbiau concrid oedd eu hangen!

Beth fyddech chi'n ddweud wrth rywun hoffai geisio gwneud hyn?

I rywun sy'n meddwl am wneud yr un peth a fi byddwn yn eu hannog i fynd amdani. Mae yna gymaint o brentisiaethau allan yno gyda nifer o gwmnïau mawr a bach ac mae'n gyfle gwych i ennill arian wrth i chi ddysgu.

Ble ydych chi'n gweld eich hun mewn 10 mlynedd?

Ymhen deng mlynedd hoffwn fod yn syrfëwr meintiau ac yn aelod o Sefydliad Brenhinol y Syrfewyr Siartredig a hefyd yn aelod o Sefydliad y Peirianwyr Sifil fel technegydd.